માતા મરૂદેવીના નંદ, દેખી તાહરી મૂર્તિ
મારૂં મન લોભાણું જી; મારૂં દિલ લોભાણુંજી,
માતા…
॥ ૧ ॥
કરુણા નાગર કરુણા-સાગર કાયા કંચનવાન;
ધોરીલંછન પાઉલે કાંઈ, ધનુષ પાંચસે માન.
માતા…
॥ ૨ ॥
ત્રિગડે બેસી ધર્મ કહંતા, સુણે પર્ષદા બાર;
જોજનગામિની વાણી મીઠી, વરસંતી જલધાર.
માતા…
॥ ૩ ॥
ઉર્વશી રૂડી અપચ્છરાને, રામા છે મન રંગ;
પાયે નેપુર રણઝણે કાંઈ, કરતી નાટારંભ.
માતા…
॥ ૪ ॥
તુંહી બ્રહ્મા તુંહી વિધાતા, તું જગ તારણહાર;
તુજ સરીખો નહિ દેવ જગતમાં, અરવડીયા આધાર.
માતા…
॥ ૫ ॥
તુંહી ભ્રાતા તુંહી ત્રાતા, તું હી જગતનો દેવ,
સુરનર કિન્નર વાસુદેવા, કરતા તુજ પદ સેવ.
માતા…
॥ ૬ ॥
શ્રી સિદ્ધાચલ તીરથ કેરો, રાજા ઋષભ જિણંદ.
કીર્તિ કરે માણેક મુનિ તાહરી, ટાળો ભવ-ભય-ફંદ.
માતા…
॥ ૭ ॥