ટેક
ઓ કરુણાના કરનારા તારી,
કરુણાનો કોઈ પાર નથી
મારા સંકટ ને હરનારા તારી,
કરુણાનો કોઈ પાર નથી
મેં પાપ કર્યા છે એવા
હું ભૂલ્યો તારી સેવા (૨ વાર)
મારી ભૂલોના ભૂલનારા,
તારી કરુણા નો કોઈ પાર નથી
હે કરુણાના કરનારા…
॥ ૧ ॥
હું અંતરમાં થઈ રાજી
ખેલ્યો છું અવળી બાજી (૨ વાર)
અવળી સવળી કરનારા,
તારી કરુણા નો કોઈ પાર નથી
હે કરુણાના કરનારા…
॥ ૨ ॥
ઓ પરમ કૃપાળુ વ્હાલા
મેં પીધા વિષના પ્યાલા (૨ વાર)
વિષ ને અમૃત કરનારા,
તારી કરુણા નો કોઈ પાર નથી
હે કરુણાના કરનારા…
॥ ૩ ॥
ભલે છોરું કછોરું થાયે
તું માવતર કહેવાયે (૨ વાર)
મીઠી છાયા દેનારા,
તારી કરુણા નો કોઈ પાર નથી
હે કરુણાના કરનારા…
॥ ૪ ॥
મને જડતો નથી કિનારો
મારો કયાંથી આવે આરો (૨ વાર)
મોક્ષ મારગ ના દેનારા,
તારી કરુણા નો કોઈ પાર નથી
હે કરુણાના કરનારા…
॥ ૫ ॥
છે ભક્તનું જીવન ઉદાસી
તારા શરણે લે વીતરાગી (૨ વાર)
ભક્તો ના દિલ હરનારા,
તારી કરુણા નો કોઈ પાર નથી
હે કરુણાના કરનારા…
॥ ૬ ॥